【恒生港元4厘】特選高息活期存款 4%港元額外活期存款年利率│上限高達800萬

【非廣告文，好物分享】恒生又嚟啦！今次唔洗買股票，又唔洗做定期，恒生港元4厘只係要你放錢入嚟港元活期結餘，就可以攞到額外4%港元活期存款年利率！不過要留意只限「特選客戶」，即係收到恒生官方宣傳訊息嗰班朋友仔先有份，即刻同大家拆解優惠條件、增長點計！

恒生港元4厘額外活期存款年利率推廣

推廣期：2026年8月1日至2026年9月30日

今次呢個「特選客戶存款增長優惠」同之前嘅「買股送息」、「兩個月定期」玩法都唔同，今次淨係要你將港元儲蓄及往來戶口結餘谷大，唔洗買股票，又唔洗做定期，就可以享有額外4%港元活期存款年利率。

簡單講，只要滿足以下三個條件，你就係天選之人：

1. 恒生「特選客戶」（收到官方宣傳訊息）
2. 8月底同9月底嘅港元活期結餘，都要分別比6月底多5萬或以上
3. 8月至9月嘅「每日平均結餘增長」部分，就可以享有4厘

重點一：合資格存款戶口

「合資格存款戶口」包括特選客戶名下所有以單名及聯名第一戶主持有的港元儲蓄及往來存款戶口。「合資格存款戶口」並不包括定期存款戶口。

今次定義同以往有分別，可能恒生終於發現有Bug！計哂Saving and Current Account！！

重點二：「兩次達標」先攞到盡

呢個係全個推廣入面最關鍵、最易踩雷嘅地方！所謂「港元活期存款增長」，係指8月31日同9月30日對比基準日（6月30日結餘）增長達$50,000或以上。

注意兩個重重重要結算日！8月31日同9月30日呢兩個結算日都要分別達到5萬增長，缺一不可。如果你8月尾谷大咗，但9月尾又走資走返，跌返落5萬以下，前功盡廢ByeBye！

安全起見，「新資金」可以由8月1日開始一直留到9月30日，咁當然過程中可以出出入入，但記得月尾要入返去。

重點三：每日平均結餘點計？

達標之後，真正享有高息嘅係「每日平均結餘增長」。其實計平均又真係幾好，啲大戶真係可以某啲日子放多啲錢，某啲日子放少日又得。即係將8月1日至9月30日成段期間嘅存款拉一個平均數出嚟（同6月30日結餘比較）。

額外利息上限：港元8,000,000（按每位特選客戶計算），超出上限嘅部分唔會有額外息。

4%息收幾多錢？實測計一計

假設你成段推廣期都做到每日平均結餘增長$1,000,000，並且8月尾、9月尾都有達到5萬嘅增長要求：

• 額外利息 = $1,000,000 × 4% × (61 ÷ 365)
• 額外利息 = 約$6600

即係話，只要你識得喺8月頭一次過將錢谷大，一路擺到9月尾，每1M就可享六千幾蚊左右嘅額外利息 (2個月時間)，純粹「留錢」就有錢收，仆到訓身啦嗎？

額外利息會喺2026年11月30日或之前存入合資格戶口，記得到時要仍然持有有效嘅綜合戶口，唔係就會被當自動放棄。

小小結語 – 低門檻抵衝

同蛋黃之前介紹嘅「買股送息」推廣或者兩個月定期存款比較，今次玩法簡單好多，操作門檻低。如果你本身有一筆閒置港元資金，又啱好收到恒生嘅推廣訊息，值得稔稔佢。至於未收到訊息嘅朋友仔，都可以留意吓恒生其他高息活期或者定期存款推廣，各取所需，最緊要啱自己。

以上文章經恒生官方推廣網頁簡介及條款及細則綜合而成，活動詳情、計算方式及最新優惠期請以恒生官方網頁為準。

---

📝歡迎大家訂閱蛋黃視野Patreon、Facebook或者加入免費TG頻道討論！

借定唔借？還得到先好借！借錢梗要還，咪俾錢中介。

本網盡量確保以上資料準確，若任何資料與你到訪的金融機構、服務供應商或特定產品網站有所出入，所有金融產品和服務均以金融機構的版本為準，使用該服務前請參閱相關金融機構網站的最更新版本之產品資訊及條款細則。如資料有誤，歡迎指正。

本文件中如有類似前瞻性陳述之內容，此等內容或陳述不得視為對任何將來表現之保證，且應注意實際情況或發展可能與該等陳述有重大落差。

*** Last Updated on 02/08/2026 by 蛋黃視野 ***