
【繼續好物分享】未出發先興奮!唔好見階梯增長就閂左佢。因為恒生條梯係贏在起跑線。恒生「特選客戶存款增長優惠」十一月再度登場!今期唔洗買股票(另一推廣:買股送息高達8厘),又唔洗做定期,只要將活期結餘谷大,港元最高可享額外4.2%活期存款年利率,美元更高達5%!同樣只限「特選客戶」,快啲入App睇下你自己有無份啦,即刻同大家拆解條件同計法。
- 往期活動:【八月特選專享恒生港元4厘】
- 往期活動:【九月全民恒生港元4厘】

恒生港元4.2厘增長優惠重點
推廣期:2026年11月1日至2027年1月31日
玩法同上一期相似,淨係睇你嘅港元/美元儲蓄及往來戶口結餘比2026年9月30日增加咗幾多。今次分成兩個階段,兩個階段都達標,就可以由頭食到尾:
| 階段 | 重要日子 | 優惠時期 | 港元額外年利率 | 美元額外年利率 |
|---|---|---|---|---|
| 1 | 2026年12月31日 | 2026年11月1日至12月31日 | 3.6% | 4.5% |
| 2 | 2027年1月30日及31日 | 2027年1月1日至31日 | 4.2% | 5.0% |
簡單講,只要滿足以下三個條件:
- 恒生「特選客戶」(收到官方宣傳訊息),並持有恒生個人綜合戶口
- 重要日子嘅活期存款增長達港元50,000或美元10,000(對比9月30日結餘)
- 達標階段內嘅「每日活期存款增長」,就可享額外年利率
重點一:合資格存款戶口
包括名下所有以單名及聯名第一戶主持有嘅港元及美元儲蓄與往來存款戶口,定期存款唔計。如果你係聯名但唔係第一戶主,App 顯示嘅結餘唔可以用嚟計優惠,要問返CS。
重點二:兩個階段,各自計算
每個階段都有獨立嘅達標日,第1階段睇12月31日,第2階段睇1月30日及31日。
- 兩個階段都達標:11月1日至1月31日全程享高息
- 只達標第1階段:只有11月1日至12月31日享息
- 只達標第2階段:只有1月1日至31日享息
- 兩個都冇達標:冇額外息
留意:如果你12月底谷大咗錢,之後走資,1月尾冇達標,第2階段嘅4.2%就冇份㗎!
另外,2027年1月30日、31日係週末。恒生建議喺營業日(星期一至六)下午六時前完成入賬,並保留資金至翌日上午九時,所以1月嗰次最好喺1月29日或之前安排好資金,唔好留到最後一刻。
如果9月30日結餘係負數或者根本冇戶口,就當作零計。你可以喺恒生 Mobile App 「資產總值」>「存款」>「存款概覽」向下滑,睇「儲蓄及往來存款結餘紀錄」,已經有同9月30日嘅對比。
重點三:額外利息點計?
每日額外利息 = 當日活期存款增長 × 適用額外年利率 ÷ 全年日數(港元365日,美元360日)。每位客戶嘅增長上限為港元8,000,000/美元1,000,000,超出部分冇額外息。
4.2%息收幾多錢?實測計一計
假設你將港元活期結餘谷大$1,000,000(較9月30日),並由11月1日留到1月31日,兩個階段都達標:
- 第1階段:$1,000,000 × 3.6% × (61日 ÷ 365) ≈ $6,016
- 第2階段:$1,000,000 × 4.2% × (31日 ÷ 365) ≈ $3,567
- 合共約 $9,583
即係三個月時間,每100萬可以多收接近一萬蚊額外利息【平均利率約3.8%;活期+大行;抵啦嗎?】,仲未計埋戶口本身嘅基本活期息 (美元有啲啲,不過可以當無)。
額外利息會喺2027年4月30日或之前存入合資格戶口。
小小結語 – 兩個日子記得守住
今期恒生港元4.2厘同八月嗰期比較,推廣期長咗到3個月,仲加入美元選擇,但重點係12月底同1月尾兩個日子都要守住增長。如果你本身有閒置資金,又啱好收到恒生訊息,值得稔稔佢。未收到訊息嘅朋友仔,都可以睇吓其他高息活期或定期存款推廣,各取所需。如果你想將資金放得更盡,絕對可以配Prestige優越理財嘅開戶獎賞雙食呀!
恒生Prestige優越理財推薦編號
覺得啱嘅,又係新客嘅你記得用蛋黃推薦編號:ORUTKO!開戶時在「推薦編號」一欄填寫以下推薦編號,或者填先填表登記再開戶又得。
以上文章經恒生官方推廣網頁簡介及條款及細則綜合而成,額外年利率根據恒生於2026年10月27日公佈之年利率計算,銀行可隨時更改。活動詳情、計算方式及最新優惠期請以恒生官方網頁為準。
📝歡迎大家訂閱蛋黃視野Patreon、Facebook或者加入免費TG頻道討論!
借定唔借?還得到先好借!借錢梗要還,咪俾錢中介。
本網盡量確保以上資料準確,若任何資料與你到訪的金融機構、服務供應商或特定產品網站有所出入,所有金融產品和服務均以金融機構的版本為準,使用該服務前請參閱相關金融機構網站的最更新版本之產品資訊及條款細則。如資料有誤,歡迎指正。
本文件中如有類似前瞻性陳述之內容,此等內容或陳述不得視為對任何將來表現之保證,且應注意實際情況或發展可能與該等陳述有重大落差。
*** Last Updated on 06/11/2026 by 蛋黃視野 ***

其實玩恒生係咪變咗一定要喺月尾之前攞返晒啲錢出嚟? 如果唔係九月做咗特選, 放到月尾嘅話變咗冇得玩最新呢一期. 因為佢係用 9月30日去計.
哈哈,對呀。恒生鼓勵大家月尾清零!
是不是每期都玩 對比結餘是不可能清零 重要日子都在月尾 我有無理解錯
對啦, 會有冷河期。無可能期期接得上