2025Q2第二季高息存款及信用卡更新。資訊更新一覽

今個四月份真係多事之春！特朗普關稅政策嚇冧咗全球股市，各國反制措施令全球貿易戰一觸即發！完全唔跟章法出棋，文章執筆是納指兩日已經跌咗超過2000點。嚟到今年第二季好多信用卡優惠推廣都更新咗，繼續收水Mode。即刻同大家簡單Update下今季高息存款及信用卡更新！

• 信銀國際大富翁存款又升級啦，之前淨係得港元嘅大富翁存款，由今個月開始多咗美元同人民幣大富翁！大家手上持有嘅美元又多一個選擇啦。不過記得玩咩貨幣都好，記得同時間出入，如果唔係好容易影響新資金計算，影響利息收入。詳情

• 信銀國際再次推出，感謝祭活動，小恩小惠啦。得閒就可以做吓任務玩吓。今季嘅外幣推廣只有日圓同美元，但玩法會有唔同，因為條款及細則新增咗一條唔可以即日進行買賣，否則就變咗唔合資格，稍後再同大家跟進。仲有頗強嘅外幣簽賬可享額外高達10%現金回贈！！

• 最強高息存款戶口大新360易出糧戶口，四月最新推廣已經出咗啦，最好嘅消息就係佢上一期嘅最高利率都冇變動，VIP最高可以去到4.4%。大家繼續可以享受高息存款，自出自入嘅自由。詳情

• 東亞World Mastercard推出咗一個類似中銀狂賞派嘅信用卡簽帳活動，累積基本獎賞合資格交易達 HK$4,000，喺指定類別簽帳可以享有5%現金回贈，回贈上限算高可以簽大約一萬蚊！整個推廣總算活化咗呢張卡，大家可以重新留意吓。

• 東亞JCB拍卡支付推廣又續咗一季啦，每個月最高回贈係$100。回贈率為15%。即係每月簽$667就拎盡$100回！玩到去九月份。詳情

• Mox轉賬限額由50萬提升至100萬，又方便咗大家走資！放心玩佢嗰個高息新資金推廣活動。仲有HKD-USD兌換無差價。其實可以搭埋信銀個推廣玩~

• 工商銀行(亞洲)信用卡超市簽帳可以有15%回贈都續咗一季，每個月可享最高回贈為$200！即係大約簽$1350就到頂。玩到去六月份。詳情

• 工商銀行(亞洲)信用卡龍騰出行推廣優惠，今個月都有續喎，只要每個月簽夠指定嘅金額就送禮龍騰出行點數！玩到去六月份。未知龍騰出行係咩嘢？自己去Google下啦要。詳情

• AEON嘅WAKUWAKU信用卡由五月份嘅月結單周期開始，每月最高簽帳回贈減至只有$200，回贈率為6%。（基本回贈率為0.4%，額外回贈率為5.6%）即係大約簽$3571就到頂啦！基本回贈率可享無上限WAKU COIN回贈，算唔算係壞消息中搵好消息？詳情

• 東亞I-Titanium / Goal 信用卡手機支付及網上支付推廣提早延續至今年九月份，大家又可以繼續用啦。記得東亞所有政府嘅簽帳超市嘅簽帳都唔會有額外回贈。要注意啦。

• 過往一年Wewa手機支付神卡上咗神枱，一年後整個推廣終於玩完了。雖然係咁，但Wewa喺做大額嘅旅遊簽帳方面都好給力，相關簽帳可享4%回贈。上限算高，可以簽五萬幾蚊。

• 滙豐EveryMile信用卡外幣簽帳兩蚊一里再次出現，不過門檻提高咗至$12,000。難道大大提高。另外，每港幣2元＝1里 指定商戶名單都有更新，大家可以留意吓。

• 滙豐同豐澤嘅信用卡簽帳推廣，今期加咗一條條款話合資格簽帳唔包括禮券。所以如果你諗住買禮券嘅話，咁就要承受一定風險啦。

暫時諗到咁多同大家Update，如果你覺得有啲有變動嘅，歡迎話我哋知！同大家一齊分享吓啦。

---

借定唔借？還得到先好借！借錢梗要還，咪俾錢中介。

喜歡❤️我地既內容👨‍🏫又想支持我地運作🙌，Patreon頻道已經啟動啦，可以立即Subscribe蛋黃視野Patreon。
你的支持是我們的動力💫✨。大家都可以Like and Follow Facebook 或者加入免費TG頻道討論!!

本網盡量確保以上資料準確，若任何資料與你到訪的金融機構、服務供應商或特定產品網站有所出入，所有金融產品和服務均以金融機構的版本為準，使用該服務前請參閱相關金融機構網站的最更新版本之產品資訊及條款細則。如資料有誤，歡迎指正。

本文件中如有類似前瞻性陳述之內容，此等內容或陳述不得視為對任何將來表現之保證，且應注意實際情況或發展可能與該等陳述有重大落差。

*** Last Updated on 05/04/2025 by 蛋黃視野 ***