市面上林林總總嘅信用卡，主流嘅Visa、Master同銀聯究竟要點樣揀呀？每張卡會有佢嘅特別功能，有啲係感應式付款抵(Apple Pay, Google Pay, Samsung Pay)，有啲係網上繳費抵，又有啲係網上簽帳抵，又有啲係食飯抵，總之有好多好多！下邊蛋黃就會同大家介紹一啲精選同必備信用卡，有咩值用卡值得推薦！立即去睇！ 如果見到佢有五星評級，基本上佢係一張必備同值得擁有嘅信用卡。如果你見唔到你想搵既卡，即係蛋黃都未覺得佢好有用途！
中銀BOC信用卡
中銀信用卡方面，蛋黃揀咗Cheers Card Visa Infinite、Sogo Visa Signature卡、Chill卡、大灣區鑽石銀聯一卡通(紅色)。Cheers Card VI 最低消費嘅$5000簽賬門檻暫時可豁免至本年7月31日。Cheers Card餐飲外幣日日4%回贈！掂！唔好忘記，今年仲有至強嘅20X狂賞派，紅日消費閒閒地都做到10%回贈。頭兩張係有五星評級，基本上要必備，而且VI入門門檻唔算低，但盡量一試。下邊冇提到嘅都想講吓：第一張係大灣區青年卡(感應式付款5%，上限都係$100)、第二張係中銀恒地會信用卡(恒地會180分=$1，其他係250分=$1)。識玩一般都會申請幾張，卡海中銀最好玩。中銀信用卡要早早申請，因為中銀信用卡係計年資嘅，你持有得佢愈耐，相關嘅推廣優惠會震撼。仲唔快啲手！相關推廣簽賬詳情。
匯豐HSBC信用卡
匯豐信用卡方面，蛋黃精選左四張卡俾大家。佢哋就係匯豐Visa signature 卡(用喺最紅自主獎賞商戶)、Red 卡(用喺所有網購)、EveryMile卡(用喺推廣活動，想換里數必備)；申請頁面。白金Visa卡就係如果申請唔到Signature 既代替品，其實白金Visa絕對唔比VS差，因為近年好多推廣都淨係專做比白金Visa卡。匯豐嘅信用卡嘅特點係佢簽賬上限都算大，靈活度高。同埋基於佢平時啲Promotion力度非常大，所以佢哋都係必備信用卡。相關推廣簽賬詳情。
渣打信用卡
渣打信用卡方面，蛋黃揀左以下呢三張，分別係Smart Visa卡、Simply Cash Visa卡同國泰Mastercard卡。Smart卡嘅優勢係佢個喺指定商戶簽賬有5%回贈，真係好好用！ 而Simply Cash Visa卡就係懶人卡一張，碌乜嘢都係1.5%回贈，仲要無上限。當碌到無野好碌就用佢幫手。國泰CX Mastercard就係草里數必備卡。CX條款更新：自2024年6月8日起，所有簽賬只有$6=1里。優惠里數兌換率變做不定期嘅推廣，推廣期內指定類別會低至$2=1里！
東亞BEA信用卡
東亞信用卡雖然佢啲卡嘅基本特色唔夠其他卡好，不過，佢平時嘅推廣活動力度都算大。佢都可以算係入到派錢信用卡行列之一。東亞值得留意既有呢三張，分別係Flyer World Master卡、I-titanium卡、鑽石銀聯雙幣信用卡。東亞信用卡其實一樣比較好玩嘅就係結餘轉戶。另外，i-titanium卡應該就係今年最大額可用嘅手機支付信用卡。今年想食Apple Pay / Google Pay就要靠佢或者Wewa卡啦。相關推廣簽賬詳情。
恒生信用卡
恒生信用卡獎賞計劃係回贈+FUN Dollars，+FUN Dollars已經可以用泥找卡數啦，1 +FUN Dollars 兌 HK$1。你唔草+FUN Dollars就係草Yuu分。Yuu分有時換食物嘅都抵嘅，但都係少之又少。MMPower卡回贈力度高，申請門檻低，每月可回贈金額達$500 +FUN Dollars，主要可以用作外幣同網上嘅大額消費簽賬。如果想草YUU分就申請一張enJoy卡(如果成日去惠康都有用嘅)。
花旗Citi信用卡
Citi信用卡都有好幾張都值得申請。每張卡有佢哋嘅唔同嘅功能！最值得留意嘅有Citi八達通信用卡，係一張搭車神卡。除此之外， 如果你有相闗需要，CitI Plus信用卡、HKTVmall同埋Citi Club Card都啱你哋用㗎。Citi信用卡可以用Payall功能來套現，所以點都應該要有一兩張傍身。Citi信用卡共用信用額，申請多一兩張都唔怕。注意：Citi嘅Rewards銀聯信用卡嘅神繳費功能已經無左了。
星展DBS信用卡
DBS食飯卡2024年開始新增左門檻每筆簽賬達$300，Eminent卡四個特選類別方面有5%簽賬回贈。其中一個就係餐飲簽賬，另外如有突然有醫療簽賬需要都記得醒起佢。DBS Black就係草里數的朋友必備嘅信用卡，佢可以換到幾個飛行計劃既機票，全年簽賬$6=1里。新航(星加坡)既機係好有水平，多多留意。最後值得蛋黃留意既係Live Fresh卡。用佢做網上外海簽賬卡係唔錯，全年都有6%回贈。或者預計下個月想訂酒店，就即刻轉做你需要既簽賬類別。
建行(亞洲)信用卡
建行(亞洲)有一張必備嘅網購卡，佢係同一個國內網購平台一齊合作嘅信用卡，叫做京東卡/JD卡/狗仔卡。用呢張卡唔一定要喺京東買嘢先有優惠，因為佢一般網購都已經做到全天候4%現金回贈。呢張卡嘅特點就係佢額度係全年咁樣計，大額嘅網購消費就啱晒啦。佢仲有一個特點就係喺實體店綁京東卡簽AlipayHK都會計做網上消費。今時今日AlipayHK已經係好多地方都支援啦，實現網上同實體店消費都可以有4%現金回贈。另外一張eye卡都可以申請，因為好多時建行亞洲做嘅信用卡推廣都唔會包京東卡，所以要有另外一張卡去參與佢啲推廣活動。
大新信用卡
如果你有玩佢嘅出糧戶口，詳情喺度，咁你點都要申請一張大新信用卡。蛋黃自己就揀咗One+信用卡，全年所有簽賬，無上限無分類別都會有1%回贈。大新年頭年尾間唔中都有啲信用卡簽賬推廣，都好值得留意。平時無咩點用，有推廣嗰陣就可以攞出嚟用！大新仲有兩張里數卡：英國航空白金卡(簽賬6港元可兌換1 Avios)同埋ANA World 萬事達卡(簽賬8港元可兌換1 Avios)，如果你有草呢兩間既飛行里數就啱哂你！
信銀國際信用卡
信銀國際蛋黃只挑選了一張Motion卡，呢張卡全年推廣喺食肆、網上都有6%現金回贈(含基本回贈0.5%)。每月上限回贈$200，即係可以簽大約3636左右。2024開始快餐店都已經包埋，唔洗驚中伏了。食飯必備無下限。申請頁面。
MOX Credit
MOX Credit 有兩大重要嘅用途係佢可以用來套現，搵返就同渣打一樣。第二個人嘅用途就係佢可以用作繳費，仲包括其他銀行嘅信用卡，變相可以做卡冚卡CCC功能。基本特色就係指定商戶有3%回贈，不過佢個上限太少了。最新登場，只要存款$75000或以上，其MOX Credit消息會無上限變左做2% Cash Back現金回贈。如果無存款，就全天候無上限簽賬1%回贈。申請頁面。
AEON信用卡
AEON嘅高回贈嘅網購WAKUWAKU卡網上消費有6%回贈，佢每月上限最多可以回$300，即係每個月可以簽$5000，額度十分足夠。佢依家呢個高回贈推廣期現時更新延至：2025 年 4 月 30 日。由6月起會，此卡現金回贈變成WAKU COIN回贈，回贈比率無變。兌換方法則有少少改變，即睇。如果你喺AEON Fans，點都應該要有返張AEON卡，因為平時去AEON超市，間唔中都有指定折扣。同埋，AEON信用卡可以當會員卡咁樣用，唔使每年比會費去續返AEON嘅會員。仲有，AEON卡做嘅日本簽賬推廣都值得留意㗎，啱哂成日返鄉下嘅你哋！相關推廣簽賬詳情。
安信信用卡
財仔卡不可怕，反而優惠力度大。安信Earnmore卡全年大額簽賬可享2%回贈！每年額度同京東卡有得揮，每年有15萬Quota。爆左都唔緊要，仲有1%無上限簽賬回贈。蛋黃覺得佢最大既用途就係綁雲閃付繳費，將一啲WeChat Pay HK同AlipayHK涵蓋唔到既繳費就由佢包底，享盡2%繳費回贈。提提大家，雲閃付信用卡繳費係唔洗比手續費㗎。最新由2024年4月1日起Wewa卡配Apple Pay，做到全天侯6%現金回贈！
此頁面會陸續更新，加入更多蛋黃一啲精選同必備信用卡。定期返嚟睇吓啦！其他開卡開戶推廣可去以下睇睇！
借定唔借？還得到先好借！
喜歡❤️我地既內容👨🏫又想支持我地🙌，可以立即點擊Buy me a coffee☕️。
你的支持是我們的動力💫✨。
想收到第一手資訊，立刻LIKE同FOLLOW 蛋黃視野FACEBOOK !!
本網盡量確保以上資料準確，若任何資料與你到訪的金融機構、服務供應商或特定產品網站有所出入，所有金融產品和服務均以金融機構的版本為準，使用該服務前請參閱相關金融機構網站的最更新版本之產品資訊及條款細則。如資料有誤，歡迎指正。
本文件中如有類似前瞻性陳述之內容，此等內容或陳述不得視為對任何將來表現之保證，且應注意實際情況或發展可能與該等陳述有重大落差。
*** Last Updated on 03/05/2024 by 蛋黃視野 ***