零手續費！以信用卡找信用卡卡數推薦 – 結餘轉戶 – MOX / 恒生 / AlipayHK / 東亞教學攻略 – 2025

今時今日用信用卡繳費已經十分普遍，繳交水電媒、政府一般賬單、保費等等。相信大家都會識經網上銀行用信用卡扣數繳費，賺取返些少積分，仲可以賺咗個時間差(免息還款期)，又或者用蛋黃之前教你嘅方法(相關文章)去繳費(AlipayHK / Wechat Pay HK / 雲閃付)。咁究竟信用卡嘅卡數又可唔可以用其他信用卡去付款？得唔得？本篇文章是信用卡找信用卡卡數推薦(結餘轉戶)就會詳細解構。

其中一張繳付神卡推薦使用安信EarnMORE鑽石銀聯卡；詳情

用其他信用卡去繳付信用卡嘅月結單，其實就即係叫做「結餘轉戶」，比人嘅感覺就好似一啲冇能力還款嘅人先要去搵第二張卡去還第一張卡嘅款項，就係啲人最唔鍾意聽到嘅”卡🤭卡”、”CCC”。絕大部份信用卡繳費功能，當用作繳付其他信用卡嘅月結單會出現高額手續費。雖然如此，現時市面上都有啲免費嘅好選擇，分別係MOX Credit，恒生信用卡、AlipayHK、同東亞結餘轉戶推廣，下面簡單講解教學攻略。

MOX Credit簡單易用 – 似足PPS

MOX Credit『繳費功能』極度簡單易用，係『繳費』頁面個到，只要按指示揀返相應嘅銀行信用卡，輸入卡號，扣數時揀用MOX Credit扣數，咁就成功交其他信用卡卡數架啦！注意返星期一至五截數時間係下午四點！於四點後提交的繳費交易將於下一個工作天完成。佢整個繳費功能背後係用繳費靈PPS，所以同PPS好似！

恒生信用卡 – 先登記後繳費

恒生信用卡相信唔洗多講，可以免費地用作繳費其信用卡卡數已經有好耐經史，也並非新功能。不過就要先落分行進行登記相關嘅信用卡！有咩信用卡可以繳？呢度！然後碌到最下寫住：如需向銀行及信用卡服務、證券公司、體育及娛樂、其他金融機構類別的商戶繳交賬單，請先填寫登記表格交去分行！登記完成後，就可以係eBanking入面搵到你登記嘅卡號賬單，咁就可以繳費架啦！

AlipayHK線上信用卡還款功能

話說AlipayHK / Wechat Pay HK推左出左信用卡還款功能一段時間，AlipayHK還款時仲可以直接揀信用卡扣數。咁當然係要比手續費啦！手續費方面，以信銀聯卡繳付需要付1.5%；Master/VISA則需要2.5%！都好貴啫！咁當然寫得出嚟係有方法去抵銷啦。點樣去抵銷留待自己再稔稔，其實又可以係先用增值功能後還款 (仲可以賺返轉頭添…)，亦都可以直接使用還款功能用指定信用卡扣數！等月結單銀行回贈返比大家。今時今日，AlipayHK / Wechat Pay HK真係愈來愈多唔同功能，所以要識玩呀！

東亞信用卡 – 預繳手續費後回贈

最後選擇就係用東亞信用卡繳費。東亞間唔中都有做網上結餘轉戶嘅推廣，唔淨止係交信用卡卡數，直頭係繳款有回贈送埋比你。好似早前嘅推廣詳情，每個月繳8萬以上，就有$100送返比你洗。所以繳費時所產生嘅手續費會於事後全額回贈。不過正正因為要先付手續費後回贈，蛋黃就比較少用佢啦！

好多人問繳付Citi信用卡卡數賬項可以用東亞信用卡扣數嗎？ 答案係可以！如果商戶/機構名稱直接揀『花旗銀行信用卡/Private Label Card』，繳款戶口無得揀信用卡，但只要你揀商戶/機構『其他銀通會員銀行』，入返信用卡號碼就得！

信用卡找信用卡卡數推薦 – 結餘轉戶小結

用信用卡繳付其他信用卡月結單，只係為咗賺取更長嘅免息還款期，最終都係要找數！不過如果你繳落啲可套現信用卡到就可以擺活期賺更多，無限Loop！最後，借定唔借，還得到先好借！

---

借定唔借？還得到先好借！借錢梗要還，咪俾錢中介。

喜歡❤️我地既內容👨‍🏫又想支持我地運作🙌，Patreon頻道已經啟動啦，可以立即Subscribe蛋黃視野Patreon。
你的支持是我們的動力💫✨。大家都可以Like and Follow Facebook 或者加入免費TG頻道討論!!

本網盡量確保以上資料準確，若任何資料與你到訪的金融機構、服務供應商或特定產品網站有所出入，所有金融產品和服務均以金融機構的版本為準，使用該服務前請參閱相關金融機構網站的最更新版本之產品資訊及條款細則。如資料有誤，歡迎指正。

本文件中如有類似前瞻性陳述之內容，此等內容或陳述不得視為對任何將來表現之保證，且應注意實際情況或發展可能與該等陳述有重大落差。

*** Last Updated on 12/03/2025 by 蛋黃視野 ***