如果大家未有免費兌換代碼，又想訂閱睇下自己個信貸評級？手機版信貸報告係經濟好多，詳情可望望官網，有不同種類嘅PLAN比大家揀。
大家有冇試過申請信用卡被拒絕？又或者係申請加信貸額、申請私人貸款失敗。呢個時候相關金融機構或者銀行都會寄返封信俾你話俾你知申請結果。如果拒絕信上列明，在是次申請「曾參閱閣下嘅信貸報告」等字眼，即符合索取環聯免費信貸報告要求！環聯是全港首間主流消費者信貸資料的參考機構(差不多都係獨市)。即刻望望以下詳情。
信用卡加額失敗 造就免費TU Report機遇
話說早排東亞6個月免息「好用錢」現金兌劃計劃有個好抵，其實而家應該都仲有呢個Plan，不過轉左打電話邀請特選客戶。(細細聲：信貸電話都唔係全部係伏) 佢個推廣最高可借50萬，只有一次性手續費$300，冇其他隱藏收費，計返APR基本上都接近免費借俾你咁濟，既然有啲咁筍嘅計劃，早前已經借左一次，今次再打嚟當然試吓谷大信用額套現備用，點知被拒絕。(信貸額已到東亞天花板) 收到東亞拒絕信後，就係咁造就左再一次可以免費查費信貸報告機會。
免費信貸報告 TU Report 申請步驟
大家可以睇睇銀行或財務機構所發出的拒絕信上有無一個免費兌換代碼。如果信上沒有指定代碼，咁你就要將你個姓名同拒絕信上的銀行或財務機構的名稱發送到環聯信貸機構電郵 tufoc@transunion.hk。電郵標題寫返『申請免費環聯信貸報告兌換代碼』即可。你可以喺電郵ATTACH埋封信比佢地。一兩日環聯就會發送指定代碼比你架啦。取得代碼後，環聯個網好清晰咁教左大家使用信貸報告代碼兌換報告嘅流程。
免費信貸報告有啲咩嘢睇？
免費的信貸報告基本上同付費無差別。不過只係一次性的信貸報告，唔會隨著時間更新，但一樣可以睇到你嘅信貸評分同評級、睇返你嘅完整信貸報告同列印版本嘅報告、信貸賬戶資料、信貸申請查詢資料等等。如下圖所示，其實信貸評級A Grade銀行一樣可以Reject你嘅信貸申請，所以TU只係銀行用作參考批出信貸嘅其中一個指標。不過，真係無必要日日J個TU Grade，需要時(準備想做按揭個陣?)都可以考慮訂閱 (從來未睇過自己嘅TU，又冇以上嘅拒絕信嘅話，又可以自己付費申請一次滿足下好奇心嘅)，只要你準時還款(不是還Min Pay)，避免過度借貸就得了。
信用卡多唔等於你會爛TU 盡早啟動TU戶口
早前文章提到及早擁有第一張嘅信用卡，建立屬於你自己信貸記錄。因為這個過程是需要好長時間，環聯要透過閣下平時嘅還款習慣、信貸使用率、信貸申請等因素去做評級。好多人會問申請得多信用卡會影響TU評分跌Grade？答案話你知係唔會，信貸賬戶超過50個都唔代表你信貸評級差。 只要唔好係同一時間不斷申請信貸戶口/信用卡就完全無問題。最後，提提大家TU戶口盡可能就早啲註冊，搵機會Activate佢。因為如果你有N張卡個陣，註冊過程中會問你一堆問題確認你身份，會有啲難度。因為要答得啱哂先可以開啟你TU賬戶。
有關影響信貸評級分數因素、點樣去令到個信貸使用率保持30%樓下，稍後再做文章同大家分享。亦知道現時有啲中介公司可以提供免費嘅信貸報告，但基於信貸資料庫資料私隱，都係直接同環聯申請好。現時環聯已提供免費基本信貸提示服務，當金融機構向環聯查閱信貸報告時，你會收到提示，以防止有其他人盜用你身份去做借貸。想睇埋其他月費計劃，可以參考返官方網頁。
借定唔借？還得到先好借！
喜歡❤️我地既內容👨🏫又想支持我地🙌，可以立即點擊Buy me a coffee☕️。
你的支持是我們的動力💫✨。
想收到第一手資訊，立刻LIKE同FOLLOW 蛋黃視野FACEBOOK !!
本網盡量確保以上資料準確，若任何資料與你到訪的金融機構、服務供應商或特定產品網站有所出入，所有金融產品和服務均以金融機構的版本為準，使用該服務前請參閱相關金融機構網站的最更新版本之產品資訊及條款細則。如資料有誤，歡迎指正。
本文件中如有類似前瞻性陳述之內容，此等內容或陳述不得視為對任何將來表現之保證，且應注意實際情況或發展可能與該等陳述有重大落差。
*** Last Updated on 20/04/2024 by 蛋黃視野 ***