以下文章只適合紀律性強嘅人，如果自問紀律性差，容易洗大咗嘅你，消費後沒有還款能力，咁信用卡唔適合你。信用卡只會令你陷入萬劫不復嘅境地，那些人還是使用現金或扣賬卡。
錢是甚麼? 是信用、是時間
錢究竟係啲咩嚟？你嘅老師有冇話你知？學校又有無教？網上已經有人做咗啲好好嘅分析，提出左唔同嘅切入點同觀點。本文挑選兩個蛋黃幾Buy嘅觀點去同大家分享。根據Wiki嘅貨幣歷史講原始生活就已經有以物易物啦，是錢嘅最原始概念。後來有以貝殼做交易貨幣，隨後正式嘅貨幣嘅出現，人與人之間嘅交易標準化。
及早擁有第一張嘅信用卡 建立屬於你自己信貸記錄
有人提到錢其中一個概念就係「信用」。一個有信用嘅人，基本上就一定有能力搵更多嘅錢。
就用信用卡為例，點解銀行願意淨係批某個信貸額度俾你，就係因為佢覺得你值咁多。蛋黃初初做大學生嗰陣第一張卡嘅信貸額都係得萬零蚊，隨着之後用卡嘅次數多咗，準時還款，出嚟社會打工後工作收入多咗，銀行願意批俾你嘅信貸額度自然隨之上升！
以渣打卡為例，如果佢批比你嘅信貸額係一萬，配合佢個免費套現功能(玩法早前講過)，變相佢一個月就係只願意派約$43比你（以現時一個月定率利率5.17%計算，做30天計算）。但當你信貸額去到十萬，即係代表銀行已經願意每個月派約$430比你。正正體現左信用愈高，就會帶比你更多嘅收益。所以，作為大學生嘅你、初初踏入社會工作嘅你，應該及早擁有第一張嘅信用卡，從而建立屬於你自己信貸記錄”TU“。建立一個靚仔嘅信貸資料庫絕非一朝一夕的時間，需要及早行動。(部分信用卡更有年資獎賞，所以真係要早早開！)
注意：絕不可以短時間內不斷申請新信用卡，咁樣會影響你個信貸紀錄，想要多張信用卡，需要一段長時間。
社會上好多例子都係有信用就會帶比你更多收益
- Carousell上相同價錢相同貨品，相信你也會揀較高評價的賣家。淘寶買嘢一般都係揀銷量高個啲。（假設數據無造假）
- 點解大型連鎖店豐澤、萬寧可以越做越大，除咗實力雄厚，賣得廣告多之外，就係佢多年來建立左一份信用，口啤同品牌形象。
- 點解產品要搵明星賣廣告？因為啲粉絲會信佢自己嘅偶像。
所以，想擁有更多嘅收入/收益，首先要提升/賺取你自己嘅信用。
富人與窮人的時間價值
第二個觀點係錢就係時間。讀金融相關嘅朋友仔一定知道，時間係有一個錢嘅內含值，在通賬，通縮，定期存款，期權等等都容易體現時間就係錢。富人有能力用錢買時間（打工嗰陣老細出錢買你嘅時間），窮人只能用時間換錢（打工仔出賣自己嘅時間換取薪金）。蛋黃每日仍然好努力出賣緊自己嘅時間。雖然如此，富人同窮人唯一嘅公平嘅地方，就係大家每日都有相同嘅時間。咁同信用卡有乜關係？再望埋落去。
信用卡免息還款期 時間就是金錢
我哋去消費嗰陣，可以選擇俾現金，又或者比信用卡。蛋黃主張幾時都係有得碌卡嘅，一定係比信用卡。用信用卡付款，除咗可以賺到信用卡公司俾你嘅豐富回贈之外(唔好睇少呢部分，每月簽$5000，假設回贈率為5%，每月回$250，一年就慳$3000了)，仲可以賺到一個長56日嘅免息還款期。免息還款期有咩用，最後咪又係要還。上一段已經講過，錢嘅其中一個概念就係時間，你只要好好利用你呢一段時間，絕對可以變出更高嘅回報。趁依家高息有高息定期嘅日子，每月10萬嘅簽賬，利用呢個還款期已經係可以袋約$430落袋（以現時一個月定率利率5.17%，做30天計算），夠仲未計碌卡既回贈獎賞金額，碌卡何樂而不為呢？知道一個月簽10萬係離地，所以呢度唔係想強調個回報有幾多，係想導出一個概念，一個習慣。
信用卡不是魔鬼負債 信用卡創富及早行動
信用卡包含了錢嘅兩大元素：信用同時間值。小行動，大改變。想以信用卡安穩地增加收益唔係唔可能，但需持之以行，玩法亦有好多，日後再談。希望大家可以盡早搵到財自密碼(可以話埋我知 lol)。
小小結論係信用卡絕對唔係一張邪惡的塑膠卡，也不是魔鬼負債（講緊只限免息還款期內），可以免費套現嘅卡梗加稔唔到點解唔去提款（TU潔僻者不適合，計劃做樓按的人也不適合）。
借定唔借？還得到先好借！
喜歡❤️我地既內容👨🏫又想支持我地🙌，可以立即點擊Buy me a coffee☕️。
你的支持是我們的動力💫✨。
想收到第一手資訊，立刻LIKE同FOLLOW 蛋黃視野FACEBOOK !!
本網盡量確保以上資料準確，若任何資料與你到訪的金融機構、服務供應商或特定產品網站有所出入，所有金融產品和服務均以金融機構的版本為準，使用該服務前請參閱相關金融機構網站的最更新版本之產品資訊及條款細則。如資料有誤，歡迎指正。
本文件中如有類似前瞻性陳述之內容，此等內容或陳述不得視為對任何將來表現之保證，且應注意實際情況或發展可能與該等陳述有重大落差。
*** Last Updated on 25/11/2023 by 蛋黃視野 ***