21/03/2024：新增現價買賣上市後機管局債4701回報率，YTM大約只有3.5%。可見以下圖表。
暗盤收報$101蚊。無乜水位的了，按照綠債4273現在價格，$101.55機管局債，似乎已經OVERSHOOT了，綠債都係差唔多Yield了。
債券分配結果簡述
香港機場管理局（機管局）債券分配結果出左啦! 一句講坐二望三。第三手有94%嘅人中。每人最多可獲配發三手。同當初建議認購金額啱啱好! 唔多唔少，無浪費到資金成本。
簡單提提其他數據。是次債券總共有17.51萬人抽，16.34萬人銀行抽；1.17萬人證券行抽。總認購金額係157億左右，即係平均每人認購9萬蚊。太進取了吧？重溫上次綠債(文章)一共有32.3萬人認購，原來足足少左近一半！
話說最近香港機場管理局（機管局）宣布發行50億元零售債券，今日（17/1）起可以開始認購，截止日期係1月25日下午二時。究竟此債券值唔值得去認購啊？佢同政府債券又有咩分別啊？懶人唔想睇內文嘅話，直飛結論：派得個兩三手，唔好稔咁耐啦，認購囉。機管局應該唔會賴債，唔會蝕，都少少益你！
機管局債券基本資料2024年
話說機管局應該係第一次喺香港發行零售債券，咁佢同政府發行嘅債券有咩分別？驟眼望好似冇咩分別，純粹係發行機構唔同！只要你信機管局唔會係兩年後還唔到錢，基本上都係咁買法。機管局一直維持其投資級別信貸評級，現時獲標普全球評為「AA+」級。目測都應該唔會咁易爆煲（雖然雷曼兄弟爆煲前都係A級，哈哈哈）
- 認購日期：1月17日09:00 至 1月25日14:00
- 債券利率：定息年利率4.25厘
- 入場費：1萬元
- 年期：2.5年，並可靈活地以認購價提前贖回
- 發行額：50億元 (不會加碼)
每季派息，定息息率為4.25厘抵唔抵？
不如講下4.25厘抵唔抵？答案係合理！美國減價日子愈來愈近，現在長年期嘅定期都已經唔會有4%以上。同埋參考返早前文章，現時以現價計政府綠色債券、通脹掛鉤債券的孳息率已經得返大約4%咁上下，所以4.25厘係比左少少甜頭你，又無太益你。好就好在佢每季派息，可以增強現金流。如果暗盤有100蚊真係唔怕接多人啲。(新增上市後機管局債4701回報率)
機管局可100%原價贖回 即包底！
投資者可以要求機管局以原價贖回其持有嘅債券，同埋未付嘅利息。每3個月可申請百分百贖回 (即係你唔想要個陣，你可以係指定時間掉返比機管局)，具有一定吸引力。即係保證大家唔會輸，所以二手市場買賣（04701）理論上唔會跌到落100蚊或以下。如果低過100大家可有落力衝。不過二手市場落如果高過100，直接係二手市場沽貨就得了。相信都會有一定嘅流通性。
結論：今次機管局嘅債券發行額得50億，政府對上一次綠債發行額有200億。最後估計真係派得個兩三手，所以唔好稔咁耐啦，認購囉。機管局應該唔會賴債，唔會蝕，都少少益你！
最後附上官方香港國際機場零售債券發行網址，內附詳細資料。
本網站所載的任何資訊均不構成任何投資產品之要約、要約招攬或建議，以上內容純屬個人意見及分享。閣下在作出任何投資決定前，務必先尋求獨立財務和稅務以及稅務建議。投資涉及風險。過往業績並不表示將來的回報。投資產品的價格及其收益可升亦可跌。
借定唔借？還得到先好借！
喜歡❤️我地既內容👨🏫又想支持我地🙌，可以立即點擊Buy me a coffee☕️。
你的支持是我們的動力💫✨。
想收到第一手資訊，立刻LIKE同FOLLOW 蛋黃視野FACEBOOK !!
本網盡量確保以上資料準確，若任何資料與你到訪的金融機構、服務供應商或特定產品網站有所出入，所有金融產品和服務均以金融機構的版本為準，使用該服務前請參閱相關金融機構網站的最更新版本之產品資訊及條款細則。如資料有誤，歡迎指正。
本文件中如有類似前瞻性陳述之內容，此等內容或陳述不得視為對任何將來表現之保證，且應注意實際情況或發展可能與該等陳述有重大落差。
*** Last Updated on 21/03/2024 by 蛋黃視野 ***