三三金融禮品卡預付卡開箱詳細介紹 – 信用卡好朋友 2026

有冇聽過海港城禮品卡？新地商場禮品卡？時代廣場禮品卡？佢哋都係一間叫三三金融(33 Finance)嘅公司幫唔同商場出嘅三三金融禮品卡/預付禮品卡。不過今日集中討論佢自家嘅銀聯同Master禮品卡。

俾大家望望個包裝先先！送禮自用都OK！

專攻信用卡優惠嘅朋友，預付禮品卡有時絕對係一個好幫手！大家做簽帳活動嗰陣，有時總會係爭少少簽未夠數。禮品卡嘅存在可以幫你完成簽未夠數嘅信用卡任務（仲要佢係計實體店消費）。又或者係做一啲網上簽賬個陣，唔想透露你手上嘅卡號碼俾一啲陌生網站，呢啲禮品卡都可以幫到你。現時OK便利店同7-11便利店主流出售嘅係『三三金融(33 Finance)』同『全球付』嘅預付卡。今日我哋先來完整介紹一下三三金融禮品卡。此文重點係想帶出呢張禮品卡同信用卡優惠係好朋友！

什麼是禮品卡？禮品卡點樣用？

禮品卡係預付卡嘅一種。首先佢要儲左值先可以用，亦都唔可以再次充值。即係你行埋去OK買呢張卡個陣，就要講你想入幾多錢落去。最少$200，最多$5000。現時主要分咗有Master同銀聯，一般做實體店同網上消費都無咩問題。(不過以蛋黃經驗有部分商戶唔接受此卡，最重要嘅係Apple無問題)使用方法同一般信用卡/扣賬卡無乜分別。

三三金融禮品卡預付卡邊度有得買？

OK便利店。買呢張卡一定要用信用卡付款/各種支付工具，或者用EPS付款。總之唔可以用現金買呢張卡，咁你問我梗係用信用卡俾啦！

禮品卡持卡人如何登錄/登入？

官方網頁頂部eWallet有『持卡人登入』，登入左之後可以查返餘額及卡有效期、已處理的交易、已授權未處理的交易等等。

禮品卡應用程式APP用途？

呢個公司都有自家應用程式App，應用程式用途都主要係用作查詢結餘等。如果你買銀聯版既禮品卡，仲可以係App入面進行二維碼交易。即係唔洗帶張卡出街，可以好似雲閃付咁樣用。呢個只係銀聯版專屬功能。Matercard係唔可以架。

禮品卡想做要網上簽賬要點樣做？

Mastercard：首先係網頁登入版面中，最後有一個客戶信息更新，如果你想做網購要登記左自己個人資料先用得。登記電話會用作網上交易時發送一次性密碼OTP比你。之後就正常用返卡號碼、卡面印刷的卡有效期、CVC保安碼等資料就可以做到網購。

銀聯卡：唔洗登記個人資料都可以直接使用，因為唔會行OTP條路。如果卡面無有效期，可以喺App入邊睇返。

禮品卡有效期可以有幾耐？

一般都係購買日起計一年計。記得買左唔想用，都可以轉讓比朋友！記得KEEP單。

蛋黃話你知此卡嘅實際用途！

1. 賺取信用卡回贈！首先睇返禮品卡可以喺邊度買？有邊間銀行嘅信用卡喺嗰個商戶可以有高回贈？
2. 有時做信用卡任務簽賬未夠額，搵禮品卡嚟幫吓手。
3. 用嚟送禮啦，又可以用嚟買張卡比小朋友傍身。因為額度限制咗，又唔怕佢佢哋用大咗。

最後補充一下，初頭講到新地都有呢款嘅禮品卡售賣，而且佢接受嘅付款方式更多元化，玩法更多！新地商場亦都全港都有，總有一個喺你附近可以用到佢。

想睇有邊啲信用卡啱網購、食飯、繳費同儲飛行里數？即刻去了解更多。

---

📝歡迎大家訂閱蛋黃視野Patreon、Facebook或者加入免費TG頻道討論！

借定唔借？還得到先好借！借錢梗要還，咪俾錢中介。

本網盡量確保以上資料準確，若任何資料與你到訪的金融機構、服務供應商或特定產品網站有所出入，所有金融產品和服務均以金融機構的版本為準，使用該服務前請參閱相關金融機構網站的最更新版本之產品資訊及條款細則。如資料有誤，歡迎指正。

本文件中如有類似前瞻性陳述之內容，此等內容或陳述不得視為對任何將來表現之保證，且應注意實際情況或發展可能與該等陳述有重大落差。

*** Last Updated on 04/01/2026 by 蛋黃視野 ***