滙豐獎賞錢Reward Cash（以下簡稱RC）對大家應該一啲都唔陌生，被譽為最強又簡單嘅信用卡積分計劃。隨時儲現金回贈又得，兌換飛行里數亦得！絕對係進可攻退可守之選。蛋黃認為獎賞錢算係一個相對容易儲分嘅信用卡積分計劃，以下就同大家講解一下獎賞錢基本資料、捉緊最佳兌換時刻等等。
Reward+一App搞掂滙豐HSBC獎賞錢計劃
要參與滙豐信用卡積分計劃，第一件事一定係要下載返佢嗰個Reward+ App (Apple / Android)。日後所有優惠登記，用積分抵銷簽賬，獎賞兌換，積分互換等等全部可以一App搞掂晒。參與咗唔同嘅推廣活動，仲可以睇到自己簽咗幾多合資格簽賬。工欲善其事必先利其器，此App是必備。
獎賞錢計算方法 抵銷簽賬零限制
基本回贈：Red卡同Everymile卡係1%回贈
白金Visa 、Visa Signature等係0.4%回贈
一般來說，Red卡同Everymile卡每簽賬$100就賺到1RC (即1%回贈)；其他信用卡 (白金Visa 、Visa Signature VS等等) 就每簽賬$250就賺到1RC (即0.4%回贈)。用基本回贈去睇，真係儲到天光都未儲到一張機票/可觀嘅獎賞錢。儲獎賞錢一定要配合唔同信用卡嘅基本特色，例如，Red卡網購4%回贈，VS最紅自主獎賞3.6%回贈等等。最紅自主獎賞詳細玩法可參考另一篇。仲有一定要配合埋推廣活動，儲到嘅獎賞錢數目一定會飛升，好容易就飛到轉日本。賺到嘅獎賞錢可以用作抵銷任何簽賬，兌換禮品兌換飛行里數等。
兌換飛行里數 捉緊額外獎賞兌換時刻
Everymile係每1RC可兌20里 飛行里數
其他卡一般係每1RC兌10里 飛行里數
滙豐獎賞錢，除咗用嚟草現金回贈之外，第二個最大嘅功用一定係用嚟換飛行里數。香港嘅用家一般主流用嘅亞洲萬里通/英航Avios都已經包括在內，絕對滿足到一般需求。如果對其他飛行夥伴計劃，咁就要開張Everymile信用卡，呢張卡可以兌換嘅飛行夥伴多達十數間！而且Everymile係1RC兌20里，足足比起其他滙豐信用卡多一倍。其他卡一般係1RC兌10里。儲到足夠嘅獎賞錢，都唔好心急立即換，因為滙豐不定期會做兌換推廣，最少可以多10%獎賞！
積分互換 一個計劃兌換不同集團積分
坐擁大量滙豐獎賞錢嘅朋友，佢哋可以將獎賞錢換做其他集團嘅唔同積分計劃。大家最有機會用到嘅應該就係屈臣氏集團(百佳)嘅易賞錢計劃MoneyBack同埋新地商場嘅『The Point』綜合會員計劃。互換基本上唔會賺到啲咩，兌換比率劃一的了，大家都係一樣價值！不過，都係好有用的。喺唔同計劃下佢哋嘅積分都有佢哋嘅用途，例如『The Point』可以換商場指定禮品、參與商場活動、仲有最最最重要係泊車！商場用積分換泊車時數係好抵。除此之外，轉換積分之後可以延長積分有效期，例如RC轉MoneyBack之後會有兩年期，調轉嘅話就視乎你綁咩滙豐信用卡係MoneyBack。一般都約2年期。
Everymile獎賞錢獨立地特別值錢
最後要提提大家，如果有換開飛行里數，Everymile信用卡內嘅獎賞錢係特別值錢，當大家分享獎賞錢俾朋友/積分抵銷簽賬嗰陣，千祈唔好揀用佢嚟扣數！重點注意：Everymile卡嘅獎賞錢只可以送出不可以用作接收。官方雖然話佢呢張相係1%獎賞錢回贈，但如果你用佢嚟換里數，佢已經係其他卡眼中嘅一倍獎賞錢，所以你可以心裏當佢係價值2%回贈！不過如果大家唔換飛行里數嘅話，呢張卡就未必值得申請啦。因為如果達唔到佢簽賬金額，要免到佢年費係會有啲困難！
借定唔借？還得到先好借！
喜歡❤️我地既內容👨🏫又想支持我地🙌，可以立即點擊Buy me a coffee☕️。
你的支持是我們的動力💫✨。
想收到第一手資訊，立刻LIKE同FOLLOW 蛋黃視野FACEBOOK !!
本網盡量確保以上資料準確，若任何資料與你到訪的金融機構、服務供應商或特定產品網站有所出入，所有金融產品和服務均以金融機構的版本為準，使用該服務前請參閱相關金融機構網站的最更新版本之產品資訊及條款細則。如資料有誤，歡迎指正。
本文件中如有類似前瞻性陳述之內容，此等內容或陳述不得視為對任何將來表現之保證，且應注意實際情況或發展可能與該等陳述有重大落差。
*** Last Updated on 15/03/2024 by 蛋黃視野 ***