[遊記] KidZania Fukuoka 日本福岡兒童職業體驗 2023 – 事前必讀旅遊體驗分享小攻略心得 – Lalaport

KidZania 是一家國際連鎖室內Playhouse，目前已在全球多個地點營運，允許兒童角色扮演成人工作並賺錢”KidZos”。小編早排去左KidZania Fukuoka玩左一日，以下係日本福岡KidZania嘅小小心得體驗分享。第一次去，好多野都唔知，記錄下來希望幫到大家。文中Q&A都係當初計劃行程時有疑問嘅地方！首先，可以睇睇福岡KidZania可以體驗的活動列表。活動體驗相都係睇住官方先XD

KidZania Fukuoka 福岡可以玩到幾多個小時？

福岡嘅KidZania一般平日(非旺季)只會有一場(一個Shift)。一個Shift嘅日子可以揀8小時(9:00~17:00)、6小時(9:00~15:00 / 11:00~17:00)、4小時(13:00~17:00)門票。週末同旺季平日就有兩場，時間分別係(9:00-14:30)同埋(15:30-20:00)。可以去官方網頁睇返當日係一場定分咗兩場。

初初未出發嗰陣，心稔玩６個鐘已經好長時間，究竟玩唔玩到咁耐？體驗完之後，原來6小時都係唔夠玩，去下兒童銀行、等待嘅時間、食吓午餐、6小時就好快過！仲有好多想玩都未有機會玩到。(又比個藉口自己下次再去)。咁可唔可以臨時加時Extend？暫時知1個Shift嘅場可以加時！進場時張Pass/證上寫左加時嘅收費！記憶中係非常合理。所以如果擔心8小時過長，可以先預約6小時體驗。作為旅客，反正大家都去得到Lalaport，就可以安排一整天時間在Lalaport + KidZania玩樂。玩完職業體驗之後就去商場行街食飯，睇埋高達就已經非常完滿。

大人細路幾多點要去到KidZania？

小編出發去KidZania當日係只有一場(平日)，只係預約左6小時的門票，我們大約係9點10分才到達售票處換票。皆因都係唔想咁Chur同懶得咁早起身，如果你想玩多啲熱門嘅職業就真係預早到場排隊(亦都同佢報名規則有關)，好似8:30就可以開始進場。這次取票入場後9秒9衝到去ピザショップ [PIZZA-LA] (職業體驗完成真係有一整個PIZZA食！)已經要預約到12:50分！因為想玩，就照BOOK咗！仲有消防員體驗、醫生等等職業都係熱選。

小朋友可以同時報幾多個職業？

職業預約時，會有以下幾點嘅規則要注意。

• 小朋友必須要在旁(畢竟係小朋友為主角的體驗，當然係要小朋友自己去報名)。
• 小朋友張職業卡上最多只可以同時間有兩個未完成嘅職業體驗。
• 第二個預約的職業唔可以在第一個已預約職業後面。

先預約一個好想玩職業，好似這次一入場預約ピザショップ[PIZZA-LA]已經去到12:50分，咁仲有幾小時做乜？就係即時搵其他可以即時開始嘅職業報。即刻去左ANA體驗[キャビンアテンダント]做空中服務員，家長仲可以扮乘客，好正。所以如果你好早去到排到，就可以先玩一個熱門職業先了，然後玩完再預約下一個熱門職業，其他時間就可以報其他職業了。

究竟小朋友唔識日文會唔會好大障礙？

唔係用日文作為母語嘅朋友仔對呢個問題應該幾大CONCERN擔心。我都唔識！日本其他Center有English Wednesday，但福岡仲未有。不過至少作為家長見到小朋友玩完一日仲會想去第二次，小朋友亦都想再去玩！唔識日文問題應該就不大啦XD 部分職業體驗都可以用英文溝通，但有部分英文就真係唔太溝通到。不過又唔洗擔心，小朋友一般都係跟住做，在場公司職員都好友善同樂意協助小朋友們。千祈唔好睇少自己小朋友嘅溝通能力呀，指手畫腳都OK架啦！

KidZania App小工具有助你發掘哪些職業有得預約！

日本KidZania本身會有App可以Download，雖然只有日文版，但真係要必備，係一個流動嘅職業空缺顯示牌。不過要先轉做左日本App Store地區先可以搵到同下載安裝。改變App Store地區方法就先要Google一下，然後可以COPY『キッザニア』去搜尋一下，就會見到同可以安裝架啦！然後去到現場的職業空缺顯示牌輸入返當日嘅4位數字密碼就可以實時睇到當刻邊D職業準備開始同邊啲職業會有空缺啦！唯一美中不足就係無空缺位置數量。如果帶住兩個小朋友，行到埋去淨底一個位就報唔到名了。打開左App唔識睇都唔重要，用另一個電話裝上Google Translate影住佢就可以翻譯！附上Apple App Store / Google Play 應用程式嘅Link比大家參考。

睇地圖預先計劃 — 賺KidZos換禮物

福岡嘅KidZania Floor Plan / City Map / 地圖 可以Click呢到！可以先睇有咩職業想體驗，地圖入面顯示左有啲職業係用kidZos參加，即洗錢以黃色”-Z”顯示，有啲職業係賺kidZos以紅色”+Z”顯示。『kidZos』係打工後可以換取嘅薪金。每個小朋友入場個陣會派一張卡仔有50 kidZos，去小朋友銀行開戶口可以獲得一張Cash Card，用作出糧，存款、提款等等。當日臨走前先發覺原來去開戶口之後可以投資，每次工作後可以賺多少少kidZos薪金。最後賺到嘅kidZos小朋友可以去商店換啲小商品，是一個購物體驗。

大人可以在小朋友體驗期間進出場館嗎？

可以。有時如果小朋友喺體驗期間，大人唔知做乜好？大人可以自由進出場館，只要拎返嚟進場時嗰張Pass/證，再出口處職員會幫你給個螢光手印，咁你就可以隨時再返嚟㗎啦。除左出去Lalaport行下，其實幫小朋友搵定下一個目標職業，探下路，搵定個報名處都已經好忙XD

自駕實用小資訊

• 如果你去Lalaport KidZania，在售票處登記時會給你相應時數的免費泊車的QR Code飛仔！
• 上次亂咁泊之濟停左北立體停車場A，北停車場連接Lalaport條橋未會咁早開！要落返地面行去西面停車場。附上Lalaport官方地圖。左下圖細細紅框(西)係入口，上一層去到2/F就係KidZania。

除左實用遊記分享外，本網亦有其他信用卡資訊/推廣給大家詳閱。香港地區嘅觀眾如果想知去到外海可以碌咩信用卡最抵？可以參考分類外幣海外簽賬。

喜歡❤️我地既內容👨‍🏫又想支持我地🙌，立刻LIKE同FOLLOW 蛋黃視野FACEBOOK !!
你的支持是我們的動力💫✨。

*** Last Updated on 17/08/2023 by 蛋黃視野 ***