信用卡套利 – 現金分期計劃實戰分享兼賺現金流 – 結餘轉戶Win Win雙贏 2024

近年好多唔同嘅銀行都推出信用卡現金分期或者結餘轉戶嘅優惠。免手續費嘅結餘轉戶，相信大家都知道渣打係出晒名，詳情可見文章。今天嘅主題係關於低成本現金流，如何實現以信用卡現金分期計劃實現套息活動！唔係教你借錢去消費，唔係叫你以債還債，唔係叫你借錢去投資，而係教你無風險套利！不過都記得留意適唔適合自己用。

註：如果你硬係話港元會爆煲/銀行會執笠，咁你繼續當係一個風險啦！另外，如果你計劃未來一年需要做樓宇按揭或者閣下是TU潔癖者(雖然借左都未必要跌Grade)，都應該唔係咁適合大家。

低息信用卡現金分期 完勝私人貸款

以下嘅例子係真實個案，完美地無風險賺取可觀嘅利息。話說喺半年前，獅子銀行嘅信用卡現金分期計劃推廣利率極抵，實際年利率可低至2.7%！(六個月現金分期)，其實長年期少少實際年利率都只係大約3%。

信用卡現金分期計劃嘅重點係喺你現有嘅信用額批出現金轉戶到你銀行戶口，整個過程只係喺銀行App嗰度撳幾個掣，拎備用現金，無幾耐就批咗啦。現金分期一般都係比較容易批核，因為本身銀行已經批核咗一個信用額度俾你，你只係喺嗰個額度攞啲錢出嚟用。有別於一般嘅私人分期貸款，分期貸款會叫你交入息證明文件，要完整地走一次銀行嘅信貸批核部門。所以呢方面信用卡現金分期計劃係比較優勝！

活用高息活期存款計劃 實現利率套戥

好啦拎咗嚿錢，有啲咩用？大家仲記唔記得上年年尾市面上嘅利率係點樣？輕易都搵到5厘以上嘅三個月定期。其實做信用卡現金分期最理想就係配合高息活期存款計劃一齊玩，如大新360°「易出糧」服務 / DBS e$aver計劃。因為你每個月都需要跟返月結單好似信用卡簽賬咁樣還款，所以高息活期嘅話就直接可以拎返相應金額出嚟找數，而不影響存款利息。好似上年年尾個一期大新360°「易出糧」服務，存款利率可高達5.725%，咁仲唔係無風險套利？低成本備用現金比你淨賺近3%嘅年利率利息，加埋當時申請信用卡現金分期仲有一個可觀嘅獎賞錢回贈，基本上你做2-3個月之後已經係完全抵銷你嘅利息支出成本！一間銀行想你去借錢，另外一間銀行想你做存款，仲唔係Win Win雙贏？

唔想做任務嘅朋友可以選擇定期存款，上圖顯示2023年年尾利率也可達5.23%，但因為做定期過程中唔可以提款，所以你要有相應現金流在每次結單到期日還款。[如果你恒生/MOX有相應額度還款，又可以再遲少少先還] 不過如果你在截數日後才申請現金分期，第一期還款日在超過50天後，已覆蓋三個月定期一半。三個月完左之後，隨便擺下渣打馬拉松個啲，都已經係包贏了。

信用卡套利 – 現金分期小技巧 助你賺盡每一天

• 記得要喺月結單截數日之後申請，咁你就可以賺盡頭一期嘅免息還款日數，可以達50天以上！
• 現金分期計劃盡量揀1年內，雖然明白優惠無長年期咁抵，但可減低利率風險。
• 準備充足好重要，揀好左存款方法先好做借貸，一陣你兩頭唔到岸。
• 信用卡現金分期申請時一般未必查你TU，最多都係Soft Check，因為本身信用卡額度已經批咗俾你。私人貸款申請，就在申請個刻連金額都會上TU。
• 部分銀行嘅信用卡現金分期計劃可藉此大幅度提高你信用額度，唔使慢慢自己走去加額。
• 初初第一次借利率未必會係最靚，慢慢同銀行建立關係，有借有還下次銀行比你嘅Offer會更好。
• 聽到『真』借貸電話，唔好第一時間Cut線，先同佢傾下計，唔借唔緊要，表達你有意思下次有靚Offer一樣會找你。
• 借用DBS還款進程表計算機，清晰！可以出哂整個Repayment Schedule。

守紀律嘅你先啱玩，借定唔借？還得到先好借！

借定唔借？還得到先好借！

喜歡❤️我地既內容👨‍🏫又想支持我地🙌，Patreon頻道已經啟動啦，想收到第一手資訊，可以立即Subscribe蛋黃視野Patreon。
你的支持是我們的動力💫✨。大家都可以Like and Follow Facebook !!

本網盡量確保以上資料準確，若任何資料與你到訪的金融機構、服務供應商或特定產品網站有所出入，所有金融產品和服務均以金融機構的版本為準，使用該服務前請參閱相關金融機構網站的最更新版本之產品資訊及條款細則。如資料有誤，歡迎指正。

本文件中如有類似前瞻性陳述之內容，此等內容或陳述不得視為對任何將來表現之保證，且應注意實際情況或發展可能與該等陳述有重大落差。

*** Last Updated on 24/05/2024 by 蛋黃視野 ***