香港IB出入金全面睇│港元、美元、日元│附手續費參考│盈透證券Interactive Brokers新手入錢提存款圖解教學 2024

盈透證券Interactive Brokers IBKR (以下簡稱IB) 操作比人嘅感覺就係好複雜，但由於IB嘅用途實在太強了，可以買賣全球各式各樣投資產品，例如全球主要嘅股票市場、美國/公司債券、極優秀嘅外幣兌換匯率等等都絕對係吸引到大家去開IB嘅誘因同動力。今篇文章主要講解返香港IB出入金全面睇(存款/提款)，幫助大家係出金入當中遇到嘅問題或者情況。

IB入金主要流程，有別於其他券商，你要先話比IB知你想入幾多錢，創建存款指示。第一次要創建存款方式『使用新的存款方式』，按返唔同貨幣輸入返匯款資料，最後就可以創建入金指示。下面會詳細講解返每種貨幣嘅唔同情況。然後先去你自己嘅銀行APP/網上銀行轉錢。轉好錢之後就可以靜待資金入賬啦！

手機版：在主頁中按左上角人頭公仔，中間有Deposite Fund (入金) / 取款 (出金)。
桌面版：進入轉賬與支付面頁入面就可以見到存款及取款兩個大大個按鈕。

正常網上新開戶以你已驗證嘅戶口提存港元/美元/人民幣都無問題 [每種貨幣要獨立驗證]。所以如果你想提存唔同嘅貨幣/用其他戶口出入金，快快手去香港IB Office簽個名(金鐘)！

港元出入金步驟

港元存款：直接付款授權 eDDA 及轉數快FPS

存入港元方面可以用eDDA [直接付款授權] 及銀行轉賬FPS方法去做。eDDA實時到賬非常方便，FPS銀行轉賬方法工作天大約1小時內存款狀態就會更新的了。

eDDA：首次要開通新的eDDA，輸入你嘅銀行賬戶詳情。完成IB就會自動聯絡銀行做設定的了，部分銀行需要數天時間處理開通請求。設定完成後回到存款頁面，選擇你嘅存款指令輸入金額就可以進行存款啦，實時到賬。eDDA次數及限額可以在你的銀行App內設置，部分銀行叫『自動轉賬』管理。

轉數快(FPS)本地轉賬：輸入返你由邊一個銀行做存款嘅資料，輸入金額就可以創建存款通知的了。[網上開戶未簽名記得用已驗證銀行] 部分銀行App有得掃碼可以直接掃二維碼付款。一般做法就是在銀行App入面做轉賬，輸入返轉數快識別號碼(IB FPS ID: 0931022)同你所存入嘅金額就可以啦！記得記得轉賬時入埋『評論/給收款人的信息』輸入你嘅IB賬戶號碼(UXXXXXX)。雖然唔入唔係唔得，慢啲到賬囉。

香港本地銀行各家銀行操作間間都唔同，就略談了，同你平時做轉賬一樣就得架啦。

港元提款：港元本地電子轉帳

提港元一般揀『本地電子轉帳』就可以。首次需要輸入你『銀行帳戶號碼』，然後點選接收嘅銀行，輸入返你嘅銀行/支行代碼(分行)。例如恒生就係『024/XXX』 (分行號碼人人唔同)，然後你嘅銀行資料就會自動出現架啦！跟手輸入你登入名及密碼就可以儲存你嘅銀行訊息，回到提款頁面揀返你剛完成的提款指令，輸入提款金額就指入指令完成等收錢的了。

美元出入金步驟

美元存款：以『銀行電匯』方式入金

以Citiplus存入美金去IB示範，在入金頁面當中，先選擇美元，然後揀以『銀行電匯』方式入金，輸入你存入銀行嘅名同埋戶口號碼及存入金額，創建指令後就會見到需要匯款銀行嘅資料。去返你嘅Citibank App，在海外轉賬個到，新增一個新收款人，入返相應嘅資料就可以 [可以入021000021搵相應銀行]。不過App新增資料個陣地址欄無得分行，雖然連續打都匯到，但建議還是在網頁版(圖示)先新增匯款人的資料吧。準備就緒就可以轉錢啦！最後又好似無收電匯費，零損耗。幾小時內就已經收到錢了！

美元提款：以『銀行電匯』方式提款有電匯費

在選擇提取美元後，按下『銀行電匯』方式提款，然後就輸入返你自己嘅銀行資料。以Citibank HK為例，在網頁中頁面『由海外銀行電匯至您的Citi 戶口』教哂你對方匯款入嚟要點樣填；Citi SWIFT 代號: CITIHKAX。然後需要選擇中轉代理銀行(Correspondent bank)資料，Citibank N.A. New York，SWIFT 代號：CITIUS33XXX，照揀就可以的了。建立好你嘅銀行訊息，回到提款頁面揀返你剛完成的提款指令，輸入提款金額就OK啦。提美元提款方面最新網上資料搜集後，暫時發現各主要銀行HSBC / HSB / Citi / SC等等有大約10-15美元嘅手續費了。

日元出入金步驟無電匯費手續費

日元提存對於大家嚟講應該好重要，因為日本係大家嘅鄉下？旅行唱啲YEN旁身都好丫。日元電匯方式同美元差唔多，以下就記錄左部分重點。圖片就從略了。

日元存款方面：以Citiplus戶口電匯轉賬至日本IB Citi嘅代理銀行。由成功存款到收到IB話已收到款時間只需一天左右。存入日元嘅手續費是零，零損耗到賬！記得都係在Citi網頁版新增左日本受款人資料先。

日元提款方面：同美元流程差唔多，在選擇提取日元後，按下『銀行電匯』方式提款，然後就輸入返你自己嘅銀行資料。以Citibank HK為例，Citibank HK SWIFT 代號：CITIHKAX。然後需要選擇中轉代理銀行資料 Citibank Tokyo，SWIFT 代號：CITIJPJTXXX，照揀就可以的了。

暫時留意到香港主要銀行HSBC / HSB / Citi呢幾間都未有收手續費，如果用Citi收錢，過程中IB會顯示中轉行會收左手續費，但最後到賬都是全數收到，零損耗。

香港IB出入金全面睇注意事項

最後提提大家所有待收款/已完成/已取消嘅指示可以在「轉賬與支付」＞「轉賬狀態及歷史」入面搵得返。
記得IB每月允許一次免費取款請求。如果多於一次提款請求要收手續費呀，提港元每次會收取HKD8 / 美元每次會收取USD 10 / 日元每次會收取JPY 1600！
大家記得要有幫襯，IB係一個綜合投資產品交易平台，千祈唔好淨係用佢嚟換匯跟手出金呀，有機會封殺你架。
原則上IB出金係可以匯去世界各地你自己名下唔同嘅銀行！唔淨止係匯返嚟香港架~

手續費或者因唔同情況下有所唔同，一切以銀行收費為準。歡迎大家留言分享你嘅出入金方法同埋出入錢時有無手續費，同幾多錢手續費呢！

本網站所載的任何資訊均不構成任何投資產品之要約、要約招攬或建議，以上內容純屬個人意見及分享。閣下在作出任何投資決定前，務必先尋求獨立財務和稅務以及稅務建議。投資涉及風險。過往業績並不表示將來的回報。投資產品的價格及其收益可升亦可跌。本文件中如有類似前瞻性陳述之內容，此等內容或陳述不得視為對任何將來表現之保證，且應注意實際情況或發展可能與該等陳述有重大落差。

借定唔借？還得到先好借！

喜歡❤️我地既內容👨‍🏫又想支持我地🙌，Patreon頻道已經啟動啦，想收到第一手資訊，可以立即Subscribe蛋黃視野Patreon。
你的支持是我們的動力💫✨。大家都可以Like and Follow Facebook !!

本網盡量確保以上資料準確，若任何資料與你到訪的金融機構、服務供應商或特定產品網站有所出入，所有金融產品和服務均以金融機構的版本為準，使用該服務前請參閱相關金融機構網站的最更新版本之產品資訊及條款細則。如資料有誤，歡迎指正。

本文件中如有類似前瞻性陳述之內容，此等內容或陳述不得視為對任何將來表現之保證，且應注意實際情況或發展可能與該等陳述有重大落差。

*** Last Updated on 23/06/2024 by 蛋黃視野 ***