2024年7月信用卡優惠更新(下半年)。必讀！一覽主要變動│不斷更新中

眨下眼又半年了，今年上半年玩中銀平日10X/紅日20X狂賞派真係好爽。踏入下半年部分信用卡嘅恆常推廣都陸續推出，可惜嘅係經營環境困難，各家銀行大方向都係繼續縮皮同加辣。以下幫大家綜合左一啲主要嘅更新。即刻睇下現時已公佈嘅主要變動先。主要探討返信用卡本身特色及一啲長期優惠要注意嘅地方。即刻去睇下2024年7月下半年嘅信用卡優惠更新啦！

HSBC滙豐EveryMile / Red卡優惠變動

EveryMile 入機場貴賓室後需滿足簽賬要求

相信大家都留意到EveryMile入機場Lounge條款有所變動，9月起大家需要喺入Lounge之後簽帳滿$4000先可以免費享用服務，否則收你$250/次！而7-8月仲可以免費入多一次。其實又唔使擔心嘅，佢嘅合資格簽帳要求好低！基本上連PayMe增值都無Exclude到，每個月都已經用EveryMile增值$3000啦，又邊有難度？

*所有未誌賬／取消／退款的交易、透過滙豐流動理財及／或網上理財繳費或繳稅、現金貸款、「現金套現」分期計劃及「現金套現」計劃的提款金額並不可用作達到享用貴賓室優惠簽賬要求之合資格簽賬。條款及詳則全文。

無可厚非，如果有啲人淨係申請張卡用嚟入Lounge，平時又唔用佢做簽賬，到收年費嗰陣又想幫你免年費，着數拎盡，但冇付出？這都是成本，所以這個變動是合理預期，最重要係都可以輕易達到要求！

HSBC EveryMile外幣推廣下半年繼續。累積外幣簽賬滿$8000，海外簽賬可以有額外1.5%獎賞錢，每季最多回$225，簽賬上限則為$15000。免費旅遊保障都續左~

Red 微調每月回贈上限至400獎賞錢

Red卡回贈上限則輕輕調低咗$100獎賞錢至每月上限為$400獎賞錢。最重要嘅係網上簽帳依然保持4%獎賞錢回贈，每月簽帳上限仍有一萬大元。基本上都滿足到一般嘅需要。故此，這變動一樣影響不大。另外，刪除咗超市類別2%同埋全天侯1%無上限獎賞錢回贈變左做指定類別先有。不過一啲都唔擔心呢啲位可以用其他卡補位。一般都唔洗必定用佢做簽賬。想要1%嘅簽賬回贈EveryMile卡都比到你。附上條款及細則比大家參考。

會唔會就呢兩個變動就放棄呢兩張卡？你問我我唔會！

恒生MMPower續期無變動大額簽賬必備

MMPower現時嘅「2024恒生MMPOWER World Mastercard +FUN Dollars獎賞計劃」，優惠期將會延長至2025年12月31日。已登記之客戶毋需再次登記，所選之自選簽賬類別將繼續適用，直至獎賞計劃完結。

無得轉類別，唔重要的。主力外幤同網購唔洗揀。大家可以繼續用佢簽大額外幣同網上消費。其實恒生最近推緊佢Travel+ Visa Signature卡，但佢個上下限咁窄，真係射龍門先射得入。與其係咁用MMPower簽外幣仲正。MMPower詳情。

信銀國際銀聯卡簽人民幣？大額高達10%回贈！

一般簽賬個部分[3.5%現金回贈 Wechat / 雲閃付] 由原先每筆簽賬上限$100大元更改為每日上限$120，即係每日只可簽賬$3428。每月一共可以碌$11428。新增人民幣大額簽賬額外6%現金回贈，每日上限$3333，每月$10000，一共10%現金回贈。九折喎，如果你做到，都算係派錢推廣，但係你又有無咁多個$3000可以碌？仲要係人民幣。

合資格人民幣簽賬包括以人民幣誌賬(以信用卡月結單的簽賬貨幣為準)之零售或網上購物認可簽賬。
合資格電子錢包簽賬包括
- 通過微信支付香港錢包進行的零售交易，不包括賬單繳費;
- 以商戶掃描付款模式交易之雲閃付 APP 流動支付。[被掃交易先計] 為免生疑，不包括在雲閃付 APP 流動支付以用戶掃描商戶碼模式支付、交通費用支付或電子商務/網上簽賬。[主掃唔可以]

信銀國際大灣區雙幣信用卡人民幣及電子錢包簽賬高達10%現金回贈優惠（「10%現金回贈優惠」）之條款及細則。

中銀Visa信用卡「狂賞派 – 高達4%現金回贈」

中銀狂賞派信用卡推廣條款及細則終於曝光。新計劃下狂賞派為期三個月，但係全面獎賞力度全面減半有多。新一輪嘅狂賞派主要結構未有變化，都係分咗海外實體消費、本地實體消費、網上消費同埋繳費。不過各項回贈金額就變咗做紅日4%額外現金回贈、平日2%額外現金回贈！同而家嘅10倍20倍積分差天共地，因為回贈積分可以靠年資、驚喜星期五提高積分嘅價值，可變價值遠遠大過實實在在嘅現金回贈。

同埋最大嘅致命傷係今期只受Visa卡玩。咁樣就廢咗中銀卡近年嘅最大優勢-卡海！中銀嘅Visa卡，我諗最主流會用到都只係得SOGO同埋Cheers！人人都申請到同具有基本特色！其他Visa Card仲有恆地會、科大等等，睇落好似都無得有雙食Combo狂賞派嘅潛力。即刻去睇下仲有邊張Visa卡啱你自己用？

其他卡嘅恆常推廣都有繼續續期，暫時未受影響。稍後補回條款及細則同埋分析埋整個推廣活動簽賬上限。

東亞銀行i-titanium卡 / GOAL卡手機支付/網購4%

東亞銀行i-titanium卡手機支付及網購繼續續期至9月30日。完全無變到。手機支付及網購繼續享4%現金回贈，每月上限為$300。(每月需滿足簽賬下限$2000大元) 另外，BEA GOAL都有手機支付及網購推廣，一樣係4%，但每月回贈上限則為$200，計及基本回贈可以有4.4%，仲比i-titanium優勝少少。

東亞銀行信用卡禮遇及簽賬獎賞，詳細可參閱條款及細則。

仲有無其他2024年7月信用卡優惠更新？

暫時未有啦，如果有其他值得留意嘅推廣，有消息再同大家更新！

借定唔借？還得到先好借！

喜歡❤️我地既內容👨‍🏫又想支持我地🙌，Patreon頻道已經啟動啦，想收到第一手資訊，可以立即Subscribe蛋黃視野Patreon。
你的支持是我們的動力💫✨。大家都可以Like and Follow Facebook !!

本網盡量確保以上資料準確，若任何資料與你到訪的金融機構、服務供應商或特定產品網站有所出入，所有金融產品和服務均以金融機構的版本為準，使用該服務前請參閱相關金融機構網站的最更新版本之產品資訊及條款細則。如資料有誤，歡迎指正。

本文件中如有類似前瞻性陳述之內容，此等內容或陳述不得視為對任何將來表現之保證，且應注意實際情況或發展可能與該等陳述有重大落差。

*** Last Updated on 01/07/2024 by 蛋黃視野 ***